Baixo o lema de Os medios galegos do futuro comezan nas aulas, a Asociación de Medios en Galego (Amega) promoveu unha serie de encontros nas tres universidades públicas galegas que nesta xornada permitiron pór de relevo na Facultade de Comunicación o papel que debe ocupar o idioma galego nos medios do futuro. Promovida co patrocinio da Secretaría Xeral de Medios da Xunta de Galicia e a colaboración da facultade, este evento buscaba reflexionar sobre os retos que viven os medios nunha época de “transformación profunda marcada pola intelixencia artificial, os novos hábitos de consumo, as redes sociais, a desinformación, a alfabetización mediática, os cambios nos modelos de negocio e a aparición de novos formatos”, sinalan desde a organización.
Con ese propósito, o encontro abrangueu unha serie de relatorios de investigadores, investigadoras e profesionais, centrados en cuestións como a proximidade, a especialización ou as novas narrativas e audiencias. Conducida por Tamara Novoa, directora do dixital A Movida, a xornada foi inaugurada pola decana da Facultade de Comunicación, Emma Torres, e o secretario xeral da Lingua da Xunta de Galicia, Valentín García. Ambos reivindicaron nas súas intervencións o papel que debe xogar o idioma no futuro dos medios. Neste punto, Torres lembrou ao alumnado que cada ano saen das universidades españolas máis de 3000 novos titulados e tituladas no ámbito da comunicación e, neste contexto, “a lingua e a identidade” poden converterse nunha “vantaxe diferencial”. A decana resaltou neste punto o compromiso co idioma dunha facultade na que se forman “os futuros e futuras profesionais da comunicación e creadores de contido”. Nesa mesma liña García lembrou aos e ás asistentes “a importancia de utilizar o galego no voso labor profesional”, incidindo en que “nun mundo no que as tecnoloxías e o fluxo de información” fan que a comunicación viva un período de “continuo cambio”, existen “cousas que van permanecer, e a nosa lingua é unha delas”.
Ler a noticia completa no DUVI
Na noite do venres 20 de novembro, o Pazo da Cultura de Pontevedra acollerá a vixésima edición de Debut, o desfile no que os novos titulados e tituladas do Máster en Deseño e Dirección Creativa en Moda presentan as coleccións que desenvolveron como proxectos de fin de estudos. Co obxectivo de levar os seus deseños á pasarela, esta titulación da Facultade de Deseño abre o prazo de inscrición para colaborar como voluntarios e voluntarias neste evento, exercendo de modelos por un día. As persoas interesadas en participar poden acudir ata o 31 de outubro ao despacho de Esdemga na Facultade de Belas Artes, os luns en horario de 11.00 h a 13.30 h e de 16.30 h a 18.30 h e os mércores e venres de 11.30 h a 13.30 h e de 18.30 h a 20.30 h.
Alí, recolleranse os seus datos persoais, faráselles unha foto e tomaránselle medidas, de cara a definir a posterior selección de modelos, que virá definida polas necesidades das diferentes coleccións. “Inicialmente, buscamos arredor de 60 ou 70 persoas”, explica a coordinadora do mestrado, Lola Dopico, que incide en que se trata dunha proposta aberta “a calquera persoa que lle apeteza coñecer a experiencia” de vivir desde dentro un desfile de moda. De feito, a escolla de modelos vén determinada polos requirimentos dos diferentes proxectos, tendo en conta ademais que as prendas “son prototipos”, resultado dun traballo académico, “polo que non hai unha tallaxe extensa”.
A isto súmase o feito de que cada ano varía o número de coleccións masculinas e femininas que se levan á pasarela nun evento no que ademais dos traballos de fin de máster, preséntanse tamén proxectos realizados polo alumnado de primeiro curso do mestrado. Neste punto, Dopico sinala que, ademais de na propia xornada do desfile, precísase tamén que as persoas que queiran colaborar neste evento teñan dispoñibilidade para participar no “ensaio xeral” que se levará a cabo o sábado 14 de outubro no Pazo da Cultura, “no que se proban as prendas e se asignan os estilismos para cada modelo”.
Ler a noticia completa no DUVI
Discutir academicamente acerca do cómic contemporáneo desde as novas concepcións e usos do soporte e do formato tradicionalmente asociados á banda deseñada é o obxectivo central do XI Foro Internacional de Creación na Fronteira, que entre o luns 19 e o mércores 21 reunirá un conxunto de especialistas de diferentes áreas na sede da Vicerreitoría do campus. Promovidas polo grupo de investigación dx5 da Facultade de Belas Artes, estas xornadas buscan reflectir “as distintas maneiras nas que o cómic se relaciona con outros medios e disciplinas”, como o cinema, os videoxogos, a arquitectura ou a pintura, dando lugar a “produtos transmedia”, sinalan desde a organización.
Baixo o título de Diving the gutter: Cómic de campo expandido, intermedialidade e transmedialidade, trátase dunhas xornadas abertas ao público, que poderán seguirse tanto de xeito presencial como virtual. A través dun conxunto de conferencias, impartidas por especialistas de ámbitos como os videoxogos, o cine ou a literatura, o grupo busca promover unha reflexión sobre a evolución que está a vivir este medio e as súas “interaccións con outras disciplinas artísticas”, como sinala o profesor Miguel Cuba, director deste foro. O seu obxectivo é afondar nesa idea do cómic de campo expandido desde unha “perspectiva ampla”, de tal xeito que haxa espazo tanto para obras que parten da alteración dos formatos como para aquelas que fusionan a banda deseñada con outras disciplinas. Deste xeito, preténdese tanto abordar sobre as “conexións” do cómic co mundo do cinema ou dos videoxogos, como pór o foco “en interaccións máis complexas, nas que as linguaxes se mesturan e o cómic abandona eses parámetros tradicionalmente” asociados á banda deseñada.
Nese senso, Cuba recoñece a idea do cómic de campo expandido como algo “relativamente recente no contexto da historia do cómic”, que está permitindo “expandir a súa linguaxe e romper determinadas barreiras e estereotipos”, dando lugar a proxectos moi distintos que, non obstante, “conservan unha esencia que fainos seguir chamándoos cómic”. Neste punto, os promotores das xornadas poñen de relevo que a experimentación tanto co formato da banda deseñada como cos seus soportes, máis aló da obra impresa, constitúen “un dos aspectos máis renovadores do medio”.
Ler a noticia completa no DUVI
O concepto de zona húmida como un espazo de transición, onde se depositan e mesturan materiais diversos, constitúe o punto de partida do taller que levou dez estudantes das facultades de Comunicación, Belas Artes e Deseño a visitar a xunqueira de Alba xunto coa cineasta madrileña Candela Sotos. Fixérono na primeira sesión do taller Filmes como marismas, promovido polo Campus Crea e Novos Cinemas e no que as alumnas e alumnos seleccionados traballan nas curtametraxes que presentarán neste festival. Fano coa titorización de Sotos, que proponlles “pensar nesa lóxica dunha marisma, na que non hai xerarquía na materialidade”, como punto de partida de traballos centrados na memoria e na combinación de materiais heteroxéneos.
Os resultados finais deste taller estrearanse en decembro, na xornada de apertura da décimo primeira edición de Novos Cinemas, pondo peche a “tres meses de traballo intensos”, recoñece Sotos, que abriu este obradoiro achegándolles unha serie de referencias cinematográficas que puidesen axudarlles neste proceso. Esta primeira xornada de traballo completouse cun encontro coa vicerreitora do campus de Pontevedra, Marián Fernández, e cun percorrido por Alba, que permitiu tamén debater as primeiras ideas a desenvolver no marco deste obradoiro.
Ler a noticia completa no DUVI
Pezas que, nun espazo concreto, transforman e reinterpretan obras previas, que á súa vez naceron como rexistros de accións artísticas. Creacións artísticas que xorden como “eco ou resposta” de obras previas de Cora Novoa, Elena Rocamora, Álvaro Porras e María Sánchez, reúnense na exposición Contar os dedos, que ata o 2 de novembro pode visitarse na Sala O Abrigo da Facultade de Belas Artes. Con Novoa e Rocamora, investigadoras da Universitat Politécnica de Valencia, como comisarias, esta exposición ten como punto de partida, explican, “obras de acción que cada artista realizou de maneira individual e cuxo rexistro se traballa desde diferentes formatos e medios, como a fotografía, o vídeo e a instalación”, dando lugar a novas pezas, nun “xogo de ecos”.
Inaugurada na tarde deste xoves, esta exposición insírese nas actividades do III Congreso Internacional de Creatividade, un evento promovido polo Campus Crea co apoio da Deputación de Pontevedra, que na tarde deste venres celebra a súa clausura na sede da Vicerreitoría do campus. Dentro desta programación, a egresada da Facultade de Belas Artes Cora Novoa e a investigadora da Politécnica de Valencia Elena Rocamora deron forma a un proxecto expositivo que explora como se interrelacionan entre si un conxunto de pezas que “parten do performativo, dialogando tanto co espazo como coas outras obras”, sinala Novoa.
“Traballamos con imaxes estáticas, vídeos, diagramas, imaxes feitas obxecto...”, engade a artista e comisaria dun proxecto que parte da documentación de accións en vídeo ou fotografías. Nese senso, o punto de partida da mostra son obras individuais, mais estas “materialízanse de diferentes maneiras e repénsanse a través de diferentes formatos”, engade Rocamora, dando lugar a unha serie de “pezas eco” que dialogan tanto coas obras das dúas comisarias como coas dos artistas convidados.
Ler a noticia completa no DUVI
As transformacións que tecnoloxías como a intelixencia artificial están a xerar nos ámbitos da arte, a comunicación, o deseño e a educación constitúen o eixe temático do III Congreso Internacional de Creatividade, que este xoves e venres se desenvolve na sede da Vicerreitoría. Promovido polo Campus Crea co apoio da Deputación de Pontevedra, este evento botou a andar na mañá deste xoves pondo de relevo o papel da creatividade para atopar respostas en “tempos de transformacións profundas”, como sinalaron desde o comité organizador, así como a importancia deste encontro científico á hora de acadar a acreditación do proxecto de especialización do campus de Pontevedra. No seu programa, combínase a presentación de 46 comunicacións por parte de investigadores e investigadoras de diferentes universidades de España, Portugal, Guatemala e Colombia, cunha serie de conferencias e mesas redondas. Entre elas, o relatorio inaugural que a artista Alicia Framis centrou nas orixes e no desenvolvemento dun proxecto que levouna a converterse na primeira muller en casar cunha intelixencia artificial.
Con máis de 70 inscritos e inscritas, a inauguración do congreso correu a cargo de Marián Fernández, vicerreitora do campus de Pontevedra; Rafael Domínguez, vicepresidente da Deputación de Pontevedra; e Sara Domínguez Lloria, codirectora desta edición xunto coa catedrática Margarita Pino. “Para o Campus Crea, este congreso é un dos piares estruturais para poder acadar a acreditación do campus de especialización”, salientou Fernández Villarino, que lembrou que este proxecto ten por diante “un reto importante”, o de tratar de obter en 2028 o recoñecemento como campus de especialización do Sistema Universitario de Galicia por parte da Xunta. No camiño cara esa “meta”, apuntou, son “determinantes” accións como un congreso que “implica investigación, docencia e transferencia de coñecemento” e que contribúe ao obxectivo de converter o Campus Crea “nun ecosistema de innovación e creatividade”. Neste punto, a vicerreitora puxo de relevo o “salto cualitativo e cuantitativo” que este proxecto pode supor para o campus de Pontevedra, do que destacou a “exclusividade e particularidade” dos estudos que nel se imparten.
Ler a noticia completa no DUVI
A Sala Universitaria Profesor Manuel Moldes abre a súa programación do curso 2026/2027 con Seres, unha exposición “sobre as entidades imaxinarias que poboan o noso folclore persoal e os vínculos que establecemos con elas”, segundo sinala o seu comisario, o artista e profesor da Facultade de Belas Artes Thomas Apostolou. A través de obras de diferentes disciplinas, realizadas por seis artistas orixinarios de Reino Unido, Alemaña, Brasil, Grecia e Zimbabue, esta mostra colectiva “reivindica a arte como unha forma de contacto co inaccesible”, engade Apostolou. Promovida co apoio da Deputación de Pontevedra, Seres celebra este xoves 8, ás 19.30 horas, a súa inauguración e reúne as pezas de Murilo Álvarez, Dominic Beattie, Anna Franke, James Alec Hardy, Deny Párchei e James Wright.
Ata o 1 de decembro poderá visitarse na sala de exposicións do campus unha mostra que reúne unha “ampla variedade de disciplinas, que inclúen escultura, cerámica, pintura, debuxo, instalación, video performance, arte sonora e escultura dixital”, salienta o seu comisario. Trátase ademais de obras realizadas por creadores e creadoras con diferentes traxectorias artísticas, desde figuras xa consolidadas ata estudantes da propia Facultade de Belas Artes, como é o caso de Álvarez. As súas obras, recoñece Apostolou, “non comparten un vocabulario visual formalmente parecido”, mais conéctanse a través desa capacidade que ten a arte “como nexo de comunicación co inaccesible”, de como “arquetipos, musas, demos, heroes, monstros, compañeiros e deuses, sendo produto da mesma multitude de medos, soños, desexos e razoamentos, a miúdo se manifestaron a través da arte”.
Nese senso, Apostolou recoñece que non buscaba “obras que compartiran unhas características ou conceptos determinados”, de tal xeito que, nun comezo, a conexión entre as diferentes pezas que integran esta mostra “permaneceu invisible para min”, ata finalmente atopar esa “presenza recorrente de entidades imaxinarias”.
Ler a noticia completa no DUVI
Filmes como A pantasma da ópera ou María, raíña de Escocia e series como Xogo de Tronos forman parte das producións audiovisuais que contaron coa participación da artista téxtil e investigadora Artanza Vilas no seu deseño de vestiario. Profesora asociada na Universidade das Artes de Londres, Vilas é a responsable de impartir o taller A impresión 3D e o téxtil, unha aproximación, unha iniciativa promovida polo Campus Crea que se desenvolve este martes e mércores no CREA Lab da Vicerreitoría.
“Imos estudar as posibilidades de utilizar o lapis 3D no contexto do téxtil, ben para crear estruturas baseadas en estruturas téxtiles tradicionais, ben para traballar directamente sobre un tecido”, sinala esta deseñadora. Nese senso, tanto a utilización deste lapis 3D sobre papel, acetato ou cristal, como as súas posibilidades no traballo cos tecidos forman parte dos contidos deste taller de 14 horas, divididas en dúas xornadas, que cubriu en poucos minutos as súas doce prazas.
A actividade botou a andar na mañá deste martes cunha serie de actividades dirixidas a que as estudantes participantes se familiarizasen con manexo desta ferramenta, para logo pór o foco nas súas posibilidades á hora de crear estruturas “que se asemellen ao téxtil, aínda que non sexan tecidos tradicionais”. Para iso, explica Vilas, as alumnas traballan principalmente con filamentos ríxidos, cos que “explorar xeometrías que poidan engadir flexibilidade” ás estruturas xeradas, de tal xeito que estas “se comporten” como un elemento téxtil. Por outra banda, empregarán tamén estes lapis “para debuxar sobre o téxtil”, nun taller “moi aberto” no que irán progresivamente “aumentando o volume” deses debuxos, co propósito de que poidan explorar as súas posibilidades como “unha fórmula para debuxar en tres dimensións” sobre un tecido.
Ler a noticia completa no DUVI
Achegar ao persoal investigador unha serie de ferramentas, ideas e estratexias que permitan dar maior difusión ao seu traballo é o obxectivo central das xornadas Redes sociais e IA para mellorar a visibilidade científica e académica, que este martes e mércores se desenvolven na Facultade de Comunicación. Promovida polo grupo CP2 Comunicación Persuasiva, trátase dunha iniciativa concibida como “un espazo de intercambio, exploración e traballo práctico arredor das posibilidades que ofrecen as redes sociais e a intelixencia artificial como aliadas para mellorar a comunicación pública das nosas investigacións, proxectos e accións de transferencia”, sinalan desde a organización.
Coordinadas pola profesora Mónica Valderrama e abertas ao conxunto da comunidade universitaria, estas xornadas teñen como obxectivo contribuír a “mellorar a visibilidade da actividade científica” do grupo CP2. Con ese propósito, o seu programa abrangue catro talleres, impartidos por profesionais e centrados en aspectos como a xeración de contidos accesibles e rigorosos para redes sociais, que contidos son máis adecuados para cada plataforma ou a creación de recursos divulgativos con ferramentas de intelixencia artificial.
Como explicou Valderrama, estas xornadas parten da idea de que, “dalgún modo, hai que devolverlle á sociedade o que se está investindo nas universidades públicas” e unha forma de facelo “é contando o que se fai nos laboratorios e nas aulas”. Aínda que aberta á comunidade, explicou, esta iniciativa ten como principal destinatario o persoal docente e investigador, co obxectivo de que poidan empregar “ferramentas que están ao alcance de calquera”, como a intelixencia artificial, para que as súas iniciativas “poidan chegar a un público máis amplo”.
Ler a noticia completa no DUVI